Kamatayon sa mananagat nga nakit-an Samal, walay foul play

Davao City – Gikumpirma sa Island Garden City of Samal (IGaCoS) Police Station (PS) nga walay foul play ang kamatayon sa usa ka mananagat nga nakit-an ang naglutaw-lutaw atubangan sa Barangay Balet, Samal alas 9:00 sa buntag kagahapon, Abril 18, 2023.

Sa interbyu sa DXDC RMN Davao kang Police Lieutenant Colonel Romeo Angon, Jr, Chief of Police sa IGaCoS PS, giila niini ang biktima nga si Robert Abao Sr., 62 anyos, taga Barangay Lasang, Davao City.

Sa imbestigasyon, nanagat ang biktima ug dugay kini nakauli diin kini gikatahong na-missing sa kabanay, hangtud nga nakita na lamang ang biktima nga wala nay kinabuhi.

Matud ni Angon, posibleng giatake sa kasing-kasing ang biktima o laing rason, hinungdan nga siya nalumos.

“Giadtoan sa atoang investigator together with the coast guard. Gi-retrieve siya (victim) and then initial nga finding sa investigator, wala may any sign of foul play. So, ang speculation is drowning incident,” saysay sa pulis.

Sa pagkakaron, padayon pa nga giimbestigahan ang insidente ug nag-agad ra usab ang kapulisan sa pamilya kung ilang ipailawom sa awtopsiya ang biktima.

RadyoMaN Kirby Manzon