Davao City – Aksidente lamang sumala pa ang kamatayon sa usa ka personahe sa Mobile Patrol Group (MPG) human kini nabuthan sa iyang kaugalingong armas sa boarding house niini sa P-6, Brgy. 37-D Trading Boulevard, Davao City.
Sa pakighinabi sa DXDC RMN Davao kang Police Major Ben Baluan, MPG head, giila niini ang biktima nga si Patrolman Lloyd Ligue, 25-anyos, personahe sa MPG-Davao City diin aksidente sumala pa kining nabuthan sa iyang 9mm caliber pistol issued firearm pasado alas-11 kagabii.
Saysay sa iyang live in partner nga si Daisy Ale, lima ka bulan nga buntis, iyang gitawagan si Ligue tungod sa pagsakit sa iyang tiyan. Pag-abot sumala pa sa boarding house, gilayon niyang gitanggal ang pusil gikan sa holster ug gibutang cabinet apan kalit kining mibuto ug naigo ang ulo nga bahin sa biktima.
Nadala pa ang biktima sa ospital apan pipila ka higayon, gibawi-an na kini sa iyang kinabuhi. Sa pagkakaron, gipalawman pa sa kapulisan ang imbestigasyon labot sa insidente.
Nasayran nga kapin bulan pa lang nga na-assign si Ligue sa MPG ug apil usab kini sa mga personahe nga gipakatag atol sa Triathlon event dinhi sa syudad niadtong bulan sa Marso ning tuiga.
RadyoMaN Kirby Manzon
