Davao City – Wala nay mabuhat ang mga tagtungod ni Rico Jay Labao kon dili dawaton na lamang ang kamatayon niini human giingong nangilog og armas sulod sa police station sa Talomo alas 9:30 sa kabuntagon.
Sa interview ni RadyoMaN Paul Canono sa iyaan ni Rico nga si Mercy Labao, miingon kini nga bisan pa og aduna kini gamay nga pagduda atol sa nahitabong kamatayon sa iyang pagumangkon wala gihapon kini mabuhat gumikan kabus kini gani dili kini makapa-otopsiya kang Rico.
“Permiro nakuratan ko, dili ko makatuo nga nahimo na niya unya karon kay nahitabo naman wala na tay mahimo ana,” matod ni Mercy.
Busa nanawagan kini sa uban nilang kaperyentihan nga ila na lang dawaton ang nahitabo kang Rico ug nanghinaot kini nga matabangan sila sa gobyerno sa pinansyal alang sa pagpalubong sa patay’ng lawas sa suspek.
Nanawagan sab ang pamilya ngadto sa Department of Social Welfare and Development kinsa misaad og asistensya sa duha ka mga anak ni Rico Jay tungod hangtod karon wala pa kini nadawat nga assistance sa maong ahensya sa gobyerno.
RadyoMaN Abi Bibera
