San Jose, Antique- Ginkakibot sang mga residente sang Funda-Dalipe, San Jose , Antique sang nasapwan ang isa ka lalaki nga nagabitay sa kahoy sang madre de cacao gamit ang nylon kag yara na sa advance state of decomposition sang nagligad nga Sabado, Mayo 26.
Ginkilala ang biktima kay Mario Rene Selda, 61 anyos kag residente sang Sibalom, Antique.
Ginpahayag sang hinablos ni Selda nga naglisensya sa iya ang biktima sang nagligad nga semana nga magpadulong sa San Jose apang wala na makapauli.
Ulihi nga nakit-an ang biktima sadtong Mayo 20 kon sa diin, nagpaduulong ini sa balay sang iya pakaisa agud maghulam sang cellphone kag ginchat ang hinablos nga may ginbilin siya sa halayan.
Suno naman kay PO3 JV Señerez sang San Jose PNP, posible sobra nga depression ang gintunaan sang paghikog ni Selda bangud masami ini naga-isahanon sa ila balay.
Ginpahayag man sang hinablos sang biktima nga antes natabo ang insidente, indi mapahamtang si Selda kag masami nga wala ini sa kaugalingon bangud kapin 15 ka tuig na nga yara sa Hongkong ang iya asawa kag wala na nakapauli sa Sibalom samtang ang bugtong nila nga anak nga babayi ang nagpadulong man sa Hongkong kag indi na niya ma-contact matapos nag-deactivate sang Facebook account.
Yara man sa Manila ang mga kautoran ni Selda kag siya na lang ang nagapangabuhi upod ang isa niya ka hinablos sa probinsya sang Antique.
Kahapon, Mayo 27, nasapwan ang tatlo ka panid sang suicide note ni Selda sa halayan para sa iya anak, mga utod kag sa iya hinablos nga amo ang kaupod niya kag naga-atipan sa iya kon sa diin , nakasulat diri nga indi na lang siya pag-ihaya, sa baylo , ilubong na lang ini gilayon agud wala na sang may maperwisyo.
Plano sang pamilya nga dal-on ang bangkay ni Selda sa Iloilo agud i-crimate kag pagadal-on sa Manila ang iya abo.
May alegasyon man nga mapauli sa Pilipinas sa bulan sang Hulyo ang anak ni Selda agud sorpresahon kon tani ang amay apang sila ang nasorpresa sa balita.
(photo from web/ not the actual photo)
