Davao City – Gidasig sa Davao City Police Office ang publiko nga i-report gilayon sa pinakaduol nga istasyon sa pulis sa ilang lugar ang mga insidenteng pagpangabusar sa mga hayop.
Sa interbyu sa RMN Davao kang PSSUPT Alexander Tagum nga abli ang nakaesblisar nga Animal Welfare Desk sa matag police stations nga mudawat sa ilang mga reklamo.
Matud ni Tagum nga angay nga masilotan kadtong mga gapangdagmal sa mga hayop sama nalamang sa gihimo sa pipila ka mga suspek nga gisugba’g buhi ang usa ka iro sa may Tahimik Ave. Matina, Davao City ug gipulutan pa kini.
Pasidaan ni Tagum sa tanan nga mamahimong mapriso ang bisan kinsang mukatay og iro ug giawhag ang katawhan nga ireport kung adunay susamang mga insidente aron maaksyunan kini.
Samtang, karong adlawa napasang-at na sa Talomo PNP ang kasong may kalapasan sa RA 8485 as amended by RA 10631 Animal Welfare Act batok sa mag-amahang Epefanio ug Armando Pulbos kinsa gitudlong mga nidabdab-patay sa iro.
Ubos sa Animal Welfare Act mamahimong mapriso ug usa katuig ug unom kabulan ug usa ka adlaw ngadto sa duha ka tuig ug adunay multa nga multa nga P100,000 kung ang hayop nga gimaltrato namatay.
RadyoMaN Aimee Guinita
