Pilar, Capiz – Dakop sa ginpatigayon nga drug buybust operation sang Provincial Drug Enforcement Unit (PDEU) ang duha ka mga persona sa Barangay Sta. Fe, Pilar, Capiz. Ginkilala ang mga suspek nga sanday Jaymar Nisurtado, 28 anyos kag Noel Buenafe, isa ka drug surrenderee, lunsay residente sang Barangay Dulangan, sang nasambit nga banwa.
Nakuha sa kamot sang mga suspek ang anum tanan ka sachets sang suspected shabu, duha ka mga cellphones, 1000 pesos nga buy bust money kag mga drug paraphernalia. Sakay sa multicab nga nagaduag pula ang mga suspek sa nadakpan sa drug buy bust operation.
Madugay na nga gina-monitor sang mga kapulisan ang illegal nga buluhaton sang mga suspek, rasun nga ginkasa ang operasyon. Nahibaluan nga sa syudad sang Roxas nagakuha sang ila suplay sang illegal nga droga ang mga suspek kag ginaduso sang mga ini sa banwa sang Pilar kag mga kaiping nga kabanwahanan.
Magapangatubang sang kaso nga paglapas sa Republic Act 9165 ukon Comprehensive Dangerous Drugs Act of 2002.
