Roxas City Capiz- Lima ka mga persona ang natigayon nga madakpan sa serye sang operasyon kontra sa ilegal nga druga sang mga kapulisan sa Roxas City.
Sa Sitio San Jose, Barangay Bato, dakop ang mga persona nga sanday Luigi Loyola y Degona,29-anyos sang Hermano Subdivision Brgy. Punta Tabuc; Alfred Dais y Buhat 28-anyos kag Eduardo Bagsic y Biclar, 25-anyos sang Tabag Pontevedra, Capiz.
Narekober sa mga ini ang kabug-osan nga 13 tanan ka plastic sachets sang ginasuspetsahan ilegal nga druga nga ginabanta nagabalor sang P60, 000 pesos.
Ang nasambitan operasyon ang ginkasa sang mga katapo sang Station Drug Enforcement Unit(SDEU) sang Roxas City Police Station.
Samtang sa pihak nga bahin, natikma man sa barangay sang Dayao ang mag-asawa nga sanday Bonifacio kag Teresa Villaruz sang Brgy. San Jose, Roxas City sa diin narekober sa ila posesyon ang tatlo ka sachets sang ginasuspetsahan shabu, isa ka libo ka pesos nga buy bust money kag isa ka unit sang cellphone.
Ang nasambitan operasyon ang ginkasa sang mga katapo sang Provincial Drug Enforcement Unit(PDEU) sang Capiz Provincial Police Office sa pagpanguna ni Police Senior Inspector Hilbert Gervero.
Ang amo nga mga persona ang magapangatubang sang kaso nga pagbayolar sa R.A. 9165 ukon Comprehensive Dangerous Drugs Act of 2002.
