Roxas City, Capiz- Dakop ang tatlo ka mga persona sa ginkasa nga buy bust operation sang mga kapulisan alas 8:30 sang gab-e sa isa ka lodging house sa Brgy. Tiza Roxas City.
Ang amo nga operasyon ang ginpatigayon sang Station Drug Enforcement Unit sang Roxas City PNP sa pagpanguna ni Police Senior Inspector Larnel Frial.
Narekober nagikan sa subject person nga si Vicente Reyes y Casubis, 34-anyos nga tricycle driver sang Brgy. Punta Tabuc; Esmael Avelino sang Brgy. Lawaan nga isa ka STL sale representative kag Lela Tabanggay y Salvador,24-anyos San Roque St. ang kabug-osan nga walo ka sachet sang suspected shabu, dugang nga plastic sachet nga may residue sang illegal nga druga lakip ang buy bust money nga lima ka gatos ka pesos, pouch, tatlo ka disposable lighters kag mga drug paraphernalias.
Sanday Vicente Reyes kag Esmael Avelino ang lunsay na-categorized bilang street level target sang PNP.
Ang amo nga mga persona ang pagapasakaan sang kasu bangud sa paglapas sa section 5, 11,12 kag 15 sang R.A. 9165 ukon Comprehensive Dangerous Drugs Act of 2002.
