Roxas City, Capiz – Magapangatubang sang kaso nga paglapas sa Republic Act 9165 ukon Comprehensive Dangerous Drugs Act of 2002 ang apat ka mga persona nga nadakpan sa buy bust operation sang mga kapulisan sa Brgy Dayao kag Brgy Cagay, Roxas City.
Ginkilala ang subject person kay Analyn Abaracoso sang Barangay Duyoc, Dao, Capiz apang temporaryo nga nagapuyo sa Barangay Punta Tabuc, Roxas City kun sa diin narekober sa iya ang tatlo ka sachets sang ginasuspetsahan shabu lakip ang isa ka libo ka pesos nga buybust money. Ang amo nga persona ang ginakabig nga newly-identified drug personality.
Samtang sa Brgy Dayao, arestado man sanday Ramilo Buenafe, 43-anyos; Ervilisa Baluyot, 50-anyos, sang Barangay Lawaan, Roxas City kag Jerson dela Cruz, 32-anyos sang Barangay Libas sining siyudad.
Narekober sa mga ini ang kabug-osan nga lima ka sachet sang suspected shabu nga ginabanta nagabalor sang P40, 500 pesos kag buy bust money nga isa ka libo ka pesos.
Sa subong ang nasambitan nga mga persona ang yara na nakahunong sa karsel sang Roxas City Police Station kun sa diin igapaidalom naman sa laboratory examination ang mga narekober nga ilegal nga druga.
Ang madinalag-on nga operasyon ang natigayon pinaagi sa bulig mga katapo sang Station Drug Enforcement Team(SDET) sang Roxas City PNP.
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
