Roxas City, Capiz – Arestado ang mag-abyan sa ginpatigayon nga drug buy bust operation sang Provincial Drug Enforcement Unit (PDEU) sang Capiz Police Provincial Office (CPPO) sa Sitio Tabay, Barangay Barra, Roxas City mga 11:00 ang takna kagab-i.
Ginkilala ang mga suspek nga sanday Josefino Luna Bacalangco Jr, 27-anyos, isa ka mangingisda kag residente sang Sitio Likuan, Barangay Barra, syudad sang Roxas kag Antonio Magno Garche, 44- anyos, temporaryo nga nagapuyo sa nasambit nga barangay apang tumandok sang Sitio Kalubihan, Barangay 2, Himamaylan City, Negros Occidental.
Nakuha sa kamot sang mga suspek ang lima ka sachets sang suspected shabu nga ginabulubanta, nagabalor sang P40,000, aluminum foils, digital weighing scale, P1,000 nga buy bust money kag iban pa nga drug paraphernalia. Nahibaluan nga masami naga pot session ang mag-abyan sa isa ka abandonado nga balay nga ginabantayan ni Garche kun sa diin diri man nga duog sila gin-aresto.
Natalana nga pagapasakaan sang kaso nga paglapas sa RA 9165 ukon Comprehensive Dangerous Drugs Act of 2002 ang mga suspek. Ang mag-abyan nga Bacalangco kag Garche ang nakahunong na sa karsel sang Roxas City PNP. Ang madinalag-on nga operasyon sang PDEU, ginpangunahan ni Police Senior Inspector Hilbert Gervero.
