Mihuot na karon ang kalibotan ni Maute-ISIS sub-commander Owayda Benito Marohombsar alyas Abu Dar nga naglihok sa Lanao del Sur.
Kini human nga nailog na sa militar ang nagsilbi nilang campsite nga adunay mga bunker, tower, foxholes, empty shells ug mga bala nga ilang gipanag-iyahan.
Matud ni Joint Task Force-Ranao Deputy Commander Col. Romeo Brawner nga maglisod na si Abu Dar kauban ang 30 ka sumusunod niini tungod kay giselyuhan na ang tanang exit areas sa mga lungsod sa Tubaran ug Pagayawan.
Milihok na usab ang ubang pwersa sa gobyerno aron mapadali ang pagsikop ug hingpit nga pagpulbos sa grupo ni Abu Dar nga lakip sa mga miatake sa Marawi City niadtong miaging tuig.
Facebook Comments
