Pagadian City – Kasong frustrated murder ug murder ang giatubang karon sa tulo ka lalaki nga maoy gitudlong responsable sa pagpusil-patay sa 39 anyos nga ex-barangay tanod ug gikasamad sa 12 anyos nga batang lalaki.
Naaresto sa kapulisan ning syudad ang principal suspek nga si Bernard Arroyo kanhi konsehal sa Brgy. Bibilik, Dumalinao samtang nasikop usab ang kauban niini nga nailang si Soffio Namucatcat, garbage collector ug residente sa Purok Bakhaw B. Brgy. Kawit Pagadian.
Ang mga nahisgutan maoy gitudlong suspetasado sa pagpamusil kang Jessie Rey Ontolan ug gikasamad sa anak niini nga 12 anyos.
Sa inisyal nga imbestigasyon nasayran nga samtang nagbaklay ang biktima sa kalsada kalit kini nga gisangpit sa nagtagay nga mga suspek sa Razul Sari-Sari Store.
Maoy paglad-ok ug wala pa gani mauga ang beer sa mga ngabil sa biktima nihulbot ang suspek nga si Arroyo sa iyang pusil og diha-diha gitira nga miresulta sa hinanali nga kamatayon sa biktima diin napangan ang iyang anak.
Daling nisibat ang mga suspek human sa pagpamusil apan nasapon kini sa gilusad nga hot pursuit operation og sa dihang gihiling ang mga cellphone didto nakita ang mensahe nga’Brod ayaw patya unsay enfo diha?”
Sa ulahing taho nga nahipos sa RMN Pagadian gidakop usab ang 47 anyos nga si Rey Longinos nga maoy nagpalit og pagkaon alang sa nadakpan nga suspek.
Sa interview sa RMN Newsteam sa inahan sa biktima nibutyag nga bisan sa gibating kaguol nagpasalamat siya sa pas-pas nga lihok sa kapulisan nga misangko sa pagka-aresto sa mga suspetsado.
