Nakapadala pa og mensahe sa text ngadto sa iyang asawang si Elsa, ang kanhi mayor sa lungsod sa Clarin, Misamis Occidental nga si David Navarro, alas-5:00 sa buntag niadtong Biyernes, Oktubre 25.
Kini siyam ka oras lang sa wala pa gibanhigan sa mga armado ang sakyanan sa pulis nga nagdala kaniya ngadto sa piskalya sa Cebu nga maoy hinungdan sa kamatayon sa mayor.
Sa iyang text message nga gi-post ni Elsa sa iyang social media account pinaagi sa screen shot, nangayo og pasaylo si Navarro sa pagpakaulaw kaniya ug sa pamilya.
Giangkon sa mayor ang pagbinaklid niya sa masahista nga nakit-an sa CCTV camera sa massage parlor, apan nahimo lamang niya kadto, matud pa, tungod kay gi-insulto siya.
Ang ubang pasangil wala na niya gibuhat og gi-set up lamang siya kay bu-ot siyang pangwartahan.
Usa ka adlaw human sa maong insidente, gidakop si Navarro samtang naa siya sa airport, tungod sa kasong pagpangulata.
Namilin-bilin na ang mayor sa iyang mensahe tungod kay iyang nabati nga dili siya buhi-on sa pulis kung asa siya gikustodiya.
Usa sa iyang gibilin kang Elsa mao ang pag-atiman sa duha niya ka mga anak sa iyang unang asawa ug ang pagtugon nga dad-on kini matag-Dominggo sa simbahan.
Naandan na sa pamilya Navarro ang manimba matag-Dominggo.
Usa sa iyang gitugon nga atimanon si Mel Davidson kinsa numero unong konsehal sa lungsod nga nanumpa kagahapon isip bise mayor sa human mihulip sa namatay’ng mayor ang bise niini nga si Glorife Roa.
