Davao City- Nagpabiling supak si kanhi Gabriela Partylist ug karon Department of Social Welfare And Development (DSWD) Undersecretary Luz Ilagan sa sugyot nga ibalik ang silot kamatayon tugbang sa krimen nga hazing nga mosangpot sa kamatayon niadtong mga biktima sa pagkulata isip kabahin sa giingong secret initiation rites sa mga fraternities ug sororities.
Sumala ni Ilagan, notado na nga kasagaran sa mga mapahamtangan niini kadtong mga tawo nga pobre, way ikagasto sa abogado ug mga inosente sa krimen nga giakusa kanila. Sugyot ni Ilagan, mas maayo nga susihon ang anti-hazing law kung nganong dili man kini mapatuman sa hingpit ug wala usab nagpakabana niini ang mga eskwelahan.
Matud ni ilagan, angayan usab nga i-regulate ang pagrecruit sa mga aplikante aron maseguro nga walay hazing sa pagpanguna sa eskwelahan.
Supak si Ilagan nga himoon sa publiko ang initiation tungod kay makaapekto usab kini sa proseso. Matud ni Ilagan, ang angay himoon mao ang pagpaapil sa administrasyon aron mamonitor ug malikayan ang sobrang pagpasakit sa mga recruit nga moresulta sa kamatayon.
RadyoMan Bernard Pantallon
