Davao City- Patay ang usa ka kanhing sakop sa Philippine Army human sa hiniusang operasyon sa Philippine Drug Enforcement Agency Regional Office XI sa pagpanguna ni Director Adzhar Albani, kauban ang Nabunturan Municipal Police Station, Compostela Valley Province Drug Enforcement Unit, Compostela Valley Province Provincial Public Safety Company ug Criminal Investigation and Detection Team sa Compostela Valley Province.
Ang suspect giila nga si Daz Montefolca/Jeffrey Montefolca alyas Daks, 42 anyos, nga taga Purok 9, Barangay Poblacion, Nabunturan, Compostela Valley Province, kinsa namatay sa dihang misukol sa mga awtoridad human nakigpinusilay gamit ang .38 kalibreng revolver. Gihatud pa sa Nabunturan Doctor’s Hospital ang suspetsado apan gideklarang dead on arrival sa attending physician, samtang ang iyang live in partner nga si Nolaizah Lumiguez ang naaresto usab.
Recovered sa operasyon ang unom ka (6) sachets sa gituohang shabu nga gilangkuban sa duha ka dagkong plastic sachets, 1 medium sachet , 3 small sachets nga adunay gibug-aton nga 15 gramos nga adunay street value nga 180,000.00 pesos, nagkadaiyang drug paraphernalia ug .38 kalibreng revolver.
Si Lumiguez, detinado karon sa PDEA-XI ug gitakdang pasakaan ug kasong paglapas sa Republic Act 9165 kon mas nailang Comprehensive Dangerous Drugs Act of 2002.
RadyoMan Bernard Pantallon
