(*photo courtesy of Iligan City Police Station 5)
Sikop ang kanhi opisyal sa barangay sa gihimong anti-drug buybust operation niadtong nakalabay’ng adlaw, Miyerkoles, Enero 8, sa Barangay Poblacion, ning siyudad sa Iligan.
Giila ni Police Major Allan Abalde, hepe sa Iligan City Police Station 5 kinsa maoy mi-kasa sa operasyon kauban ang Regional Drug Enforcement Unit, ang target nga si Jamil Solaiman Camid, kinsa naila usab sa iyang mga “suki” nga si “Jamjam”.
Si Camid, 44 anyos, naa sa drug watchlist sa kapulisan ug gikonsidera kining high value target matud pa ni Abalde.
Kanhi kini kagawad sa Barangay Poblacion East sa Baloi, Lanao del Norte si Camid.
Atol sa transaksiyon sa pulis kinsa maoy nagsilbing poseur buyer, napalitan kini og usa ka dakung sachet sa shabu nga gibana-banang dunay kapin kun kulang 20 gramos ang gibug-aton ug 80 mil pesos ang gibana-bana nga market value.
Ang target anaa sulod sa iyang Toyota Corolla Sedan atol sa transaksiyon ug sa dihang gi-ukay sa mga tinugyanan sa balaod, nakuha ang 500-peso buy-bust money ug ang 79 ka piraso nga 500-pesos nga fake money nga maoy gigamit sa operasyon.
Nakuha usab sa pulis ang usa ka cellular phone nga maoy gigamit ni Camid sa iyang mga drug transactions.
Miingon si Abalde nga gipailawom si Camid sa upat ka bulan ng surviellance ayha nahimo ang maong operasyon. (Divina M. Suson, DXIC RMN Iligan)
