(Courtesy: ICPS 1)
Nasikop kagahapon sa buntag ang usa ka kanhi pulis, kinsa nagtago sulod sa kapin duha ka tuig, human kini gi-akusahan nga adunay kalabutan sa pagpatay sa usa ka kanhi estudyante.
Matud pa ni Major Rixell Torayno, hepe sa Iligan City Police Station 1, nga ilang nasikop si Creighen Padayhag sulod sa iyang gi-rentahang apartment sa Green Village, Barangay Hinaplanon, ning dakbayan.
Gisikop si Padayhag pinaagi sa warrant of arrest nga gipagawas ug gipirmahan niadtong Enero 22, 2018 ni Judge Leonor Quiṅones sa Regional Trial Court Branch 6, ning siyudad sa Iligan.
Usa si Padayhag sa pito ka mga pulis nga gi-akusahang adunay kalambigitan sa pagpusil-patay niadtong Agosto 2016 sa usa ka 21 anyos nga si Rafshanie Amerol Azis, ang graduating nga Criminology student.
Na-dismiss ang kaso batok sa lima ka mga pulis apan nakit-an nga adunay igong hinungdan aron ipadayon ang kaso batok kang Padayhag ug sa laing pulis nga si PO1 Andro Sumaylo kinsa nagtago.
Kauban sa maong warrant of arrest si Sumaylo kinsa nagtago karong mga panahona. (Divina M. Suson, July 23)
