Kanhi Salugpungan teacher nga wanted arestado

Davao City – Kasong Expanded Anti-Trafficking in Persons Act of 2012 ang atubangon sa usa ka kanhi magtutudlo sa Salugpongan Ta ‘Tanu Igkanogon Community Learning Center, Incorporated (STTICLCI) sa Talaingod, Davao del Norte human nadakpan sa operasyon sa awtoridad sa Barangay Cabuyoan, Mabini, Davao de Oro niadtong Nobyembre 4, 2022.

Sa interbyu sa DXDC RMN Davao kang Police Corporal Miegee Filipinas, Warrant PNPO sa Kapalong Municipal Police Station (MPS), giila niini ang suspek nga si alyas Nita, kanhi community teacher sa maong eskwelahan.

Matud ni Filipinas, nadakpan sa Davao de Oro ang suspek apan ang warrant niini naka-address sa UCCP Haran, Davao City.

“Ingon pud niya, 15 years na siya nagtudlo didto (sa STTICLCI). Kadtong mga bata nga gikan og Talaingod nga gidala’g Cebu, isa pud siya nga nakaadto didto sa Cebu,” saysay ni Filipinas.

Kahinumduman nga niadtong 2018 sa dihang nagpatabang sa LGU Talaingod ang mga ginikanan human nga walay pananghid nga gikuha sa mga membro sa Salugpungan Ta Tanu Igkanogon ang ilang mga anak, diin muabot sa 13 ka estudyante gikan Talaingod ang na-rescue sa Cebu City.

RadyoMaN Kirby Manzon