Kanhi sekyu, patay human misukol sa buy bust operation

28

Patay ang usa ka kanhi security guard human misukol sa buy bust operation sa kapulisan sa Misamis Oriental mga alas 10:35 kagabie.

 

Ang suspek mao ang 45 anyos nga si Arnel Saguing, ulitawo ug taga Zone 3, Tuburan, Barangay Poblacion, El Salvador City.

 

Matud ni Police Sr. Insp. Allan Añasco nga nakaangkon sa duha ka samad pinusilan sa lawas si Saguing.

 

Gibutyag ni Añasco nga unang gipabuthan sa suspek ang kapulisan sa duha ka higayon maong napugos sila sa pagpusil niini.

 

Nakuhaan sa tulo ka sachet sa shabu ang suspek ug kalibre .38 nga armas.

 

Gidugang ni Police Sr. Insp. Añasco nga si Saguing nalakip sa drug watchlist sa kapulisan ug Philippine Drug Enforcement Agency o PDEA Region 10.

 

Ang operasyon gihimo pinaagi sa hiniusang pwersa sa kapulisan sa El Salvador City, PDEA ug Misamis Oriental Provincial Drug Enforcement Unit.

Facebook Comments