Alabel, Sarangani Province—padayon pa ang gihimong imbistigasyon sa Alabel PNP kalabutan sa pagpamusil patay sa kanhing asset sa Criminal Investigation and Detection Team-Alabel sa area sa Prk. Upper Silangan, Barangay Maribulan sa maong lungsod.
Biktima sa pagpamusil nailhang si Glen Suico, 39, residenti sa samang lugar. Gabie niadtong Lunes, June 12, 2017 samtang nag dula ug Villard sa maong lugar ang biktima kalit lang miabot ang duha ka mga suspek nga sakay sa motorsiklo nga XRM kolor Itom.
Nakaangkon ug samad sa nagkandaiyang parti sa kalawasan ang biktima nga hinungdan sa iyang kamatayon.Ang duha ka mga suspek paspas nga misibat human sa insidenti.
Sumala ni Police Chief Inspector Benjie Anchita, hepe sa Alabel PNP nga dihang nahitabo ang krimen, 100 metros lang ang gilayuon gikan sa nahimutangan sa iyang mga sakop nga murespondi unta sa gireport nga sugal sa maong lugar.
Nadunggan pa sa iyang mga sakop ang buto buto sa pusil apan paspas nga nakasibat ang mga suspek.
Sa inisyal nga imbistigasyon, pulos naka sul-ob ug bonnet ang mga suspek nga responsabli sa krimen.
Usa sa mga anggulong gitutukan karon sa Alabel PNP ang kalabutan sa utang human gikumperma sa asawa niini nga daghang tawo ang nag sige ug paningil sa iyang bana.
Wala usab gibaliwala sa kapulisan ang uban pang anggulo nga posibling mahimong motibo sa pagpatay sa biktima.
