General Santos City—Giandam na ni kanhing DPWH 12 regional director Reynaldo Tamayo Sr. ang iyahang kaugalingon sa posibling pagpatawag kaniya sa ipahigayong imbestigasyon sa Kamara o sa Senado may kalabutan sa kontrobersiyal nga road right of way scam nga kung asa gipunterya ang General Santos City.
Matud pa kang Tamayo, nga welcome alang kaniya ang unsa mang pagahimuong imbestigasyon aron dinhi maklaruhan kung si kinsa kinsa ang mga nakabinipisyo sa multi bilyong road right of way scam pinaagi sa pag piki sa mga titulo sa yuta aron lamang maka claim sa road right of way nga naagian sa mga proyekto sa DPWH Region 12.
Kahibaluan nga gilambigit ang pangalan sa kanhing opisyal sa DPWH Region 12 sa maong kontrobersiyal kung asa apiktado matud pa ang iyahang pamilya.
Dugang pa ni Tamayo nga tuig 2012 lamang kining milingkud sa pwesto isip Regional Director sa DPWH 12 og 2009 pa nahitabo ang multi billion road right of way scam. Sa pagkakaron ginapaabot na lamang ni Tamayo ang imbetasyon ngadto kaniya alang sa maong imbestigasyon.
Kahibaluan nga una ng namahayag ang staff ni Senador Manny Pacquiao nga si Atty. Lagare nga posibling dinhi sa Gensan ipahigayon ang Senate inquiry may kalabutan sa 8.7 billion pesos nga road right of way scam. (Emir Bariquit)
