Guipos, Zamboanga del Sur – Nibanos na sa pwesto isip bag-ong labaw sa 53rd Infantry (Matapat) Battalion, Philippine Army ang kanhing spokesperson sa Marawi Siege human sa gipahigayong change of command ceremony sa Camp Sabido, Poblacion, Guipos, Zamboanga del Sur kagahapon.
Gipulihan ni Lt. Col. Jo-ar Herrera, si Lt. Col. Marlowe Patria nga moyaka usab sa bag-ong posisyon isip Assistant Chief of Staff for Civil Military Operations, G7 sa 1st Infantry “Tabak” Division.
Si Herrera usa ka miembro sa Philippine Military Academy Class of 1999. Giila usab nga ranger ug topnotcher sa klase sa Psyops Officers Course sa Fort Bragg, North Carolina, USA.
Migradwar siya sa kursong Master of Arts Major in Social and Development Studies sa University of the Philippines Baguio.
Iya usab nahuman ang iyang Command and Staff Course sa Goh Keng Swee Command and Staff College sa nasud sa Singapore, diin sa mga requirements sa posisyon nga iyang gihuptan karon.
Sa iyang mensahe, gipasalamatan ni Herrera ang pagsalig sa iyang katakos nga mamuno sa 53rd IB dungan ang paghangyo ngadto sa mga Local Chief Executives nga suportahan ang programa Armadong Kusog sa Nasud ug kampanya sa president.
Gidayeg usab ni Maj. Gen. Generoso “Gene” Ponio, Commander sa 1st Infantry Division ug presiding officer, si outgoing battalion commander Lt. Col. Patria tungod sa iyang mga naangkon nga kalampusan.
Sigon ni Ponio nga kampante siya nga halapad ang panglantaw ni Lt. Col. Herrera alang sa dugang kadaugan ug kalampusan.
Gitunol usab sa kanhing Commander nga si Patria ang iyang pasalamat sa tanang Stakeholders nga nahimong katimbayayong sa iyang pagdumala sa batalyon sulod sa duha ka tuig, usa ka bulan ug lima ka adlaw.
(Photo: 53rd Infantry (Matapat) Battalion)
