Kapin 100 ka pamilya sa Mawab, gi-evacuate tungod sa risgo sa landslide

Davao City – Gisiguro karon sa Municipal Disaster Risk Reduction and Management Office (MDRRMO) sa Mawab, Davao de Oro, nga luwas ang Sitio Estabillo sa Barangay Andili ayha mubalik ang gihikling nga mga residente.

Sa interbyu sa DXDC RMN Davao kang Ruel Helicame, head sa MDRRMO Mawab, gisaysay niini nga nagpahigayon sila og preemptive evacuation human nga delikado ang lugar alang sa mga residente kung magpadayon ang nasinatiang pag-ulan epekto sa Low Pressure Area (LPA).

“Giinspeksyon ni (ang Sitio Estabillo). Gi-hazard assessment ni sa PHIVOLCS (Philippine Institute of Volcanology and Seismology) Manila. Nakitaan gyud sya og mga tension crack. So, gi-advise-an nila nga naa gyoy risgo nga posibleng mahitabo kung ugaling magkakusog ang ulan,” sulti ni Helicame.

Nasayrang kapin 100 ka mga pamilya gikan sa nahisgutang sitio ang anaa karon sa evacuation center. Samtang, aduna usay pipila ka residente sa Barangay Poblacion ug Barangay Nueva Visayas ang gihikling tungod sa pagbaha.

Sa pagkakaron, natunolan na og tabang gikan sa lokal nga panggamhanan ang mga residenteng naapektuhan sa maong kalamidad.

RadyoMaN Kirby Manzon