Kapin 100 ka rice retailers hapit na makadawat sa 15k

Davao City – Madawat na sa dili madugay sa mga rice retailers ang 15k nga cash subsidy gikan sa gobyerno ug target sa Department of Social Worker and Development (DSWD) Davao Region nga himoon ang payout sulod karon nga semanahona.

Apan gitin-aw ni DSWD XI Focal Person Carmela “Digs” Duron nga dili pa tanang rice retailers sa entero Rehiyon Onse ang mahatagan og 15k nga cash assistance tungod anaa lang sa 152 ka retailers ang mareleasan og ayuda sa DSWD XI.

Giingon ni Duron nga ang nasampit nga mga benepisaryo lehitimo milangkob sa inisyal nga listahan gikan sa Department of Trade and Industry (DTI) Davao Region nga maoy gipasa ngadto sa DSWD XI.

Matod ni Duron, karong Setyembre 13,2023 ang payout sa rice retailers nga gikan sa Tagum City, Mati City, Panabo City, Digos City, ug Davao City, ug pipila ka lungsod.

Suma kang Duron nga personal adtuon sa mga tindahan ug itunol ang ayuda sa mga kuwalipikadong benepisyaryo.

Giklaro pa sa focal person nga dili ang ilang buhatan ang nagdeterminar sa mga rice retailers apan ang DTI XI ug dili pa sab masuta kon kanus-a na pod mahitabo ang sunod nga hugna sa payout sa ayuda pinansiyal.

RadyoMaN Joel Viray