Davao City – Nagpahimangno ang usa ka health official sa syudad sa Davao nga posible’ng muabot sa kapin usa ka libo ang madugang nga kaso sa Coronavirus Disease 2019 (COVID-19) ugaling magbaton og surge sa kaso labi na human ang selebrasyon sa Pasko ingon man sa Bag-ong Tuig.
Atol sa One Davao on COVID-19 Virtual Presser gibutyag ni Dr. Ashley Lopez, Davao City Task Force COVID-19 Focal Person nga adunay forecast tool nga ginagamit ang syudad diin kini aprubado sa Department of Health (DOH) ug ginagamit sa ubang probinsya ug syudad sa Pilipinas.
Matud ni Lopez nga mas maayo nga adunay kahibalo kung unsa ang angay pangandaman ugaling musaka og kalit ang kaso sa COVID-19 diin usa sa gi-andam sa City Government of Davao mao ang dugang Temporary Treatment and Monitoring Facilities (TTMFs).
“Credible ‘ni siya nga forecast and this is good and advantageous to us so that we could easily determine kung asa ‘ta padulong in the next two weeks or a month,” segun ni Lopez.
Gipasabot sa health official nga mamahimo’ng malikayan ang maong insidente kung ang Davaoeños istriktong musunod sa mga ginapatuman nga health protocols sama sa paglikay sa mass gatherings, pagsuot og face mask ug face shield ingon man pagbaton og social distancing.
RadyoMaN Kirby Manzon
