Kapin sa P2.4 million nga balor sang suspected shabu ang nakuha sa isa ka high value target (HVT) sa buybust operation sa Purok Lampirong, Brgy. 2, Bacolod City, las-10:55 kagab-i.
Ginkilala ang suspetsado kay Arthuro Geronimo alyas Jojo, 38-anyos sang Villa Esperanza, Brgy. Sincang Airport, Bacolod City.
Sandig sa blotter report sang Police Station 2, nagdaho ang suspetsado sang isa ka big heat-sealed sachet sang suspected shabu sa police poseur buyer kabaylo sang P34,000 nga buybust money.
Nakuha pa sa posisyon ni Geronimo ang dugang pa nga 3 ka big heat-sealed sachet sang suspected shabu, isa ka plastic ice wrapper nga may unod nga suspected shabu kag isa ka black pouch.
Sa interview sang DYHB sa commander sang Police Station 2 nga si Police Major Sherlock Gabana, mga duha nila ka semana nga gin-monitor si Geronimo antis natigayon ang buybust, kag gindugang sini nga isa man ang suspek sa mga nagadagdag sang suplay sang druga sa Brgy. 2.
Kaso nga paglapas sa Section 5 (selling) kag 11 (possession) sang RA 9165 ukon Comprehensive Dangerous Drugs Act of 2002 ang natalana ipasaka batok sa suspek subong nga adlaw.
[image: image.png]
