Sakay sa bus sa kagamhanang lokal sa Iligan, nahidangat kagahapon sa hapon ang kapin 20 ka mga Iliganon gikan sa kauluhan ug ubang bahin sa nasud.
Ang 14 kanila mga repatriated overseas Filipino workers ug mga Iliganon nga nagbakasyon sa ubang nasud apan naabtan sa lockdown samtang ang uban nanarbaho sa ubang dapit nga gustong mo-uli human mahunong ang ilang trabaho.
Ang laing kapin napulo kanila gisundo sa pantalan sa Cagayan de Oro, matud sa driver sa bus, apan wala na-klaro kung asa sila gikan.
Gi-deretso ang maong returning residents sa Iligan COVID-19 Quarantine and Treatment Facility (ICQTF) sa E and R Hospital alang sa triaging o pagkuha sa mga detalye sa ilang biyahe sama sa kung na-swab test sila, na-quarantine sila o pagsusi kanila kung aduna silay gibating simtomas.
Dala ang ilang mga papel pagpamatuod nga negatibo ang ilang swab test ug na-quarantine sila og 14 ka adlaw, usa-usa silang nga gi-check up sa tulo ka mga nurse sa ICQTF.
I-quarantine og laing 14 ka adlaw sa quarantine facility sa LGU sa Buruun o kaha sa Tubod ang adunay gipakitang simtomas sa COVID-19 o kaha kung wala ma-swab test.
Apan, kung walay simtomas ug na-swab test sila sa kung asa gikan, ipailawom lamang sila sa 14 ka adlaw nga strict home quarantine. (Divina M. Suson, ICQTF, May 27)
