Kapin 2,000 ka mga pamilya, apektado sa pagbaha sa Davao Region

Davao City- Nasinati sa pipila ka mga probinsya sa rehiyon onse ang mga pagbaha resulta sa wala’y undang nga ulan dala sa Inter-Tropical Convergence Zone (ITCZ) gikan niadtong September 17, 2023.

Sa gipagulang initial assessment sa Office of Civil Defense (OCD) XI ug Regional Disaster Risk Reduction and Management Council (RDRRMC 11), kapin 2,000 ka mga pamilya gikan sa 5 ka mga barangay sa Davao del Norte, Davao Occidental, ug Davao del Sur ang naapektuhan sa ITCZ ug grabeng pagbaha.

Natala usab ang pipila ka mga pagdahili sa yuta lakip na ang mga lugar nga Don Mariano Marcos, Lupon, Davao Oriental, Sarangani, Davao Occidental ug pipila ka mga barangay sa Asuncion, Davao del Norte sama sa Buan, Camansa, Sonlon, Cambanogoy, Cabaywa, ug Sta. Felomina.

Matud pa sa usa ka Sharlyn Dablo, taga Malusing Zone 1 Sta. Cruz Davao del Sur nga sa pagkakaron, nihubas na ang baha apan nagpabiling taga tuhod ang ilang ginasagubang nga lapok.

RadyoMan Ivy Parido