Kapin 3 million nga kantidad sa shabu, nasakmit sulod sa usa ka lodge sa Tagum City

Davao City – Wala na nakaikyas pa ang 49 anyos nga negosyante human kini nadakpan sa otoridad nga nagbaton og P3,400,000 nga kantidad sa shabu atol sa gilusad nga illegal buy bust operation sulod sa iladong lodge sa Brgy. Mankilam, Tagum City niadtong July 13, 2024 sa gabii.

Sa impormasyon gikan sa Tagum City Police Station, giila lamang ang suspect nga si alyas Dadang, High Value Individual nga taga Bagong Silang, Quezon City.

Sa pagrekisa sa kapulisan, nakuha gikan sa posisyon niini ang upat ka dagkong pakete nga gisudlan sa kapin 3 million pesos nga illegal drugs.

Subay niini, naalarma ang Tagumenyos ug sumala sa komento sa usa ka Cheche Datu, gawas sa sunod-sunod nga shooting incident ug napalgang patay’ng lawas sa lungsod, nagkadako na usab ang kantidad sa masakmit nga druga.

Samtang sa Panabo City, nahipos usab ang kapin P100,000 nga kantidad sa shabu gikan sa drug pusher ug users nga naatlan sa kapulisan nga nag-shabu session.

Sa karon, anaa na sa kustodiya sa otoridad ang mga suspetsado.

RadyoMan Ivy Parido