-Photo Courtesy Joharah Amer Mauna Ali
Moabot na ngadto sa kapin 30 ka mga balay sa Marawi City ang nakit-ang naguba human miagi sa lima ka mga barangay ang dakung buhawi, pasado alas-2:00 sa hapon kagahapon, Lunes, Nobyembre 4.
Kini base sa inisyal nga damage assessment sa Disaster Risk Reduction and Management Office human ang maong kalamidad nga miigo sa mga barangay sa Saber, Fort, Loksa Datu, Green ug Sagonsongan.
Matud pa ni Marawi Mayor Majul Gandamra, gisugdan dayun sa DRRMO ang pagpahigayon og damage assessment kagahapon apan wala kini mahuman tungod kay gabii na.
Hinoon, walay natahong nasamdan o na-injured sa maong panghitabo apan lakip nga nadamyos ang to-ong bahin sa city hall, nga maoy gigamit nga opisina sa city council, human gilupad ang mga atop niini.
Ubay-ubay usab nga mga punoan sa kahoy, sulod sa kampo sa 103rd Infantry Brigade, ug dunay mga poste sa LASURECO ang nangatumba, hinungdan sa pagkawala sa kuryente sa ubang bahin sa Marawi.
Hangin, ug dili tubig, ang dala sa maong buhawi nga milungtad sa lima ngadto na sa pulo ka minutos.
