Mokabat sa kapin kun kulang 300 mil pesos ang kantidad sa gituohang shabu ang nakuha sa mga kapulisan sa gihimong anti-drug buybust operation, pasado alas-10:00 sa gabii niadtong miaging adlaw, sa Purok 2 Compound, Barangay Tomas Cabili ning siyudad sa Iligan.
Sa maong operasyon, sikop ang upat ka mga suspek sa tigpayuhot og droga.
Giila ni Police Captain Felix Rabago ang mga nasikop nga sila si Jamil Salim, 32 anyos; ug Nadir Haypa, 18, pulos mga taga-Barangay Molondo, Marawi City; Al Sharief Tanog, 38 anyos; ug Aslinah Ditanongon Dimalna, 37, taga-Tomas Cabili, ning siyudad sa Iligan.
Miingon si Rabago nga si Salim ang target sa maong operasyon kinsa napalitan sa poseur buyer og usa ka dakung sachet sa gituohang shabu.
Nakuha usab gikan kaniya ang 500 pesos nga buybust money ug laing duha ka dagkung sachet sa gituohang shabu ug usa ka timbangan o digital weighing scale.
Sa kang Tanog nakuha ang tulo ka mga dagkung sachet sa gituohang shabu samtang si Dimalna nakuhaan og usa ka dakung sachet sa gituohan gihapong shabu.
Gibana-banang moabot sa kapin kun kulang 80 gramos ang gibug-aton sa maong mga droga.
Gikonsiderang high value target si Salim tungod sa gidaghanon sa droga nga nakuha gikan kaniya. (Divina M. Suson, DXIC RMN Iligan)
