Zamboanga del Sur – Walay preno ang pagsutoy sa kaso sa COVID-19 sa probinsya sa Zamboanga del Sur, gisugid ni Zamboanga del Sur Medical Center Chief of Hospital nga si Dr. Anatalio Cagampang Jr. nga ang katawhang Zambosurians mao ang tinuod nga anaa sa frontline sa pandemya ug ‘last liner’ na ang hospital.
Gipasabot ni Dr. Cagampang nga ang tinuod nga pakigbisog batok sa virus anaa na sa kamot sa komunidad og dakong kaakuhan sa matag usa ang pagsanong sa preventive measures aron dili na mokuyanap pa ang virus.
Gibutyag pa sa doktor nga miabot na og 63 ka mga health care workers sa ZDSMC ang nagpositibo sa COVID-19 ug kung padayon kining sitwasyona, posible mo-collapse ang health care system sa probinsya.
Paghangyo ni Cagampang sa katawhan, magpundo sa balay kung walay importanteng lakaw, magsuot og face mask ug i-practice ang proper hygiene.
Labaw sa tanan matud niya, importante kaayo ang magpabakuna aron makab-ot ang gitinguha nga herd immunity.
