Nakumpiska sa operatiba sa Regional Police Drug Enforcement Unit – 10 ang kapin sa 70 mil pesos nga balor sa druga. Kini human nga nasikop ang usa ka food delivery rider ug gi-ingong pintor sa gilusad nga drug buy bust operation sa Western Kolambog sa Brgy. Lapasan ning syudad sa Cagayan de Oro.
Naila ang mga dinakpan, food delivery rider nga 30 anyos nga si Jefrey Galicia alyas Paulian, minyo nga residenti sa Gaabucayan sa Brgy. Lapasan ning syudad ug ang pintor nga 26 anyos nga si Jayric Penar, ulitawo nga residenti sa St. John, Brgy. Puntod ning syudad.
Napalitan sa usa ka sachet balor 1000 pesos ang mga suspek kung diin maoy hinungdan sa ilang pagka-aresto. Nakuha pa gikan sa ilang posisyon ang laing 3 ka mga sachet sa gituhoang shabu, 2 ka unit sa keypad cellphone, ang motorsiklo nga gamit sa food delivery ug ang 1000 peso bill nga ginamit isip buy bust money.
Gibana-banang motimbang sa 10 grams ang mga kontrabando nga nakuha gikan sa mga suspek nga dunay street market value nga moabot ngadto sa 72,000 pesos.
Mga suspek detinado na sa Maharlika Custodial Facility samtang kasong pagsupak sa RA 9165 ang posibleng atubangon nila ngadto sa korte.
Kasama mo sa mga balita, RadyoMaN Andy Coco, DXCC Tatak RMN!
