Moabot sa kapin kun kulang 150 ka mga Maranaw ang nagtapok kagahapon sa buntag sulod sa usa ka mosque sa lungsod sa Baloi, Lanao del Norte.
Sila gilangkuban sa mga bata, mga batan-on, mga babayeng nagbitbit sa ilang puya ug gagamy’ng anak, mga edaran o senior citizen, aduna pay person with disability o PWD, gawas sa mga anaa sa hingkod og pangidaron.
Kini aron isaulog ang Eid’l Fitr, pinaagi sa usa ka simba, isip pagtapos sa usa ka bulan nga Ramadan.
Bisan paman sa patakaran sa gobyerno nga nagsuspende sa tanang matang sa mass gathering sa nasud tungod sa hulga sa coronavirus pandemic, miingon si Hadji Sirad Abdul-asis, ang Imam sa maong mosque, nga wala sila mahadlok sa virus.
Nakahuman sila, matud pa, sa duha ka bulan nga community quarantine ug walay namatay sa ilang lungsod tungod sa COVID-19 busa nagtoo sila nga si Allah ang nasayod sa ilang tagsa-tagsa ka kinabuhi.
Tungod kay gamay ang maong mosque, walay social distancing nga nahitabo, walay nakit-an kanila ng nagsuot og facemask ug wala usay gibutang nga alcohol o disinfectant sa entrance sa maong mosque.
Tungod niini, miingon si Baloi Mayor Hanifah Ali nga ipatawag karong adlawa ang kapitan sa barangay nga nahimutangan sa maong mosque aron imbestigahan kung nganong nahitabo ang maong panagtapok.
Niadtong Marso 13 pa nagpagawas sa iyang executive order number 10 si Ali isip pagsuporta sa guideline sa National Inter-Agency Task Force nga suspendido ang tanang matang sa panagtapok o mass gathering. (Divina M. Suson/ Baloi, Lanao del/ May 25)
