Kapin gatus ka mga residente sa Piagapo, Lanao del Sur, mitapos og training sa pagka BPAT

Photo courtesy: Piagapo LGU

Mitapos sa ilang training niadtong nakalabay’ng mga adlaw, Enero 10, ang 104 ka mga kalalakihan aron mamahimong miyembro sa Barangay Peacekeeping Action Team sa Piagapo, Lanao del Sur nga gipahigayon sa Philippine National Police.

Gipangunahan ni Lanao del Sur Police Provincial Office (LDSPPO) Director Senior Superintendent Madzgani Mukaram ug Piagapo Mayor Ali Sumandar ang paghatag sa mga certificates of completion ngadto kanilang magsilbi nga police force multipliers.


Atol sa ilang closing ceremony, gisaad ni nga hingpit nga suporta ang ihatag sa PNP ngadto sa mga nagtapos sa BPAT training isip kaabag ug partner sa kapulisan sa pagpatuman sa mga balaod sa komunidad.

Si Sumandar sa iyang bahin nag-awhag ngadto kanila nga maghi-usa aron mamintinar ang malinawon nga komunidad ug relasyon sa matag lumulupyo.

Ang BPAT gimugna isip primary operators sa pagpahigayon og community-oriented policing ug public safety system pinasubay sa utoridad sa National Peace and Order Council (NPOC) ug sa PNP.

Kung kahinumduman nga usa ka military operation ang gipahigayon sa usa ka barangay sa Piagapo, usa ka bulan sa wala pa mahitabo ang Marawi siege niadtong Mayo 2017, aron silhigon ang mga teroristang Maute-ISIS kinsa nagsugod na paglublob sa usa sa mga bukid sa maong lungsod.

Human sa pipila ka adlaw nga combat operation, nakit-an sa dapit ang mga patay’ng lawas sa gituohang mga langyaw nga terrorist fighters, lakip na ang usa ka Imam nga lumulupyo sa maong barangay.

Ang mga residente sa Barangay Gacap miingon nga usa ang maong Imam sa na-recruit sa mga terorista ug nahimong guide sa ilang dugang pagpang recruit og mga miyembro sa dapit. (Divina M. Suson)

Facebook Comments