Kapin libo ka mga magtiayon, dungan nga gikasal sa Lala, Lanao del Norte

Dungan nga gikasal kagahapon ang kapin libo ka mga magtiayon sa lungsod sa Lala, Lanao del Norte. Gikan sila sa 27 ka mga barangay sa lungsod nga nag-ipon sulod sa daghang katuigan. 

Ang mass wedding, nga gitawag og Kasalan Ng Bayan, usa sa mga highlights sa founding anniversary celebration sa Lala nga gipaluyuhan sa LGU Lala ug partner nga Everca Foundation.

Gitugutan na ang mga dagkung tapok sa Lala tungod kay naa na sa alert level 1 ang risk status sa probinsiya ug nag-zero COVID case na sa lungsod.

Gipahigayon ang wedding rites sa mismo’ng open ground sa munisipyo. 

Lakip nga nagpakasal ang magtiayong Erlan Espinosa ug Mary Ann Pobadora, kinsa nag-ipon sulod na sa dose ka tuig. Person with disability si Espinosa, walay duha ka mga ti-il busa nag wheel chair siya pagpaso. 

Nagpakasal usab ang magtiayong senior citizen nga sila si Roger Francisco ug Jovy Amador kinsa nag-ipon sulod na sa 14 ka tuig. Trisikad driver si Francisco busa human sa kasal, wala nay selebrasyon tungod kay kinahanglan pa niyang mobiyahe aron makapalit og bugas. 

Sumala ni Vice Mayor Cesar Yap, Jr., mas bentaha nga mahimong legal ang ilang kaminyoon aron dili maglisod sa pag-claim sa mga benepisyo ang ilang mga anak. 

Busa, sumala ni Yap, bisan unsa paman ang sitwasyon sa ilang panginabuhi, ang importante, legal ang ilang kaminyoon. | Via |Divina M. Suson