Kapin P2 million shabu nasakmit sa Tagum, suspect dakpan

Davao City – Muabot sa P2,142,000 ang kantidad sa iligal nga droga nga nasakmit sa awtoridad atoll sa pagsilbi og search warrant batok sa usa ka lalaki sa Barangay Mankilan, Tagum City, Davao del Norte.

Sa report sa Police Regional Office (PRO)-XI, ang suspect mao si alyas Gerson, 38 anyos, residente sa lugar ug gikonsiderang High Value Individual, diin atol sa operasyon gawas sa gituohang shabu, narekober sab sa awtoridad ang mga drug paraphernalia, .22 caliber revolver ug mga bala ug mga non-drug item.

Nadakpan ang suspect nga anaa karon sa kustodiya sa Tagum City Police Station ug mag-atubang tukmang kaso kalabot sa droga ug paghupot og armas.

Gisaludohan sab sa PRO-XI ang mga ahensya nga nagtibangay nga miresulta sa malampusong operasyon sama sa Davao del Norte Police Provincial Intelligence Unit, 1st Davao Norte Provincial Mobile Force Company (1st DNPMFC), Regional Intelligence Unit – Provincial Intelligence Team (RIU-PIT), Davao del Norte Special Weapons and Tactics ug Tagum City Police Station.

RadyoMaN Kirby Manzon