Davao City – Naharos sa Philippine Drug Enforcement Agency 11 (PDEA-XI) og dakop ang mga drug suspects kagahapong adlawa sa usa ka adlaw nga sunod-sunod nga buy-bust operations sa nagkadaiyang parte sa Davao City.
Gibutyag ni PDEA XI spokesperson Noli Dimaandal nga nisumada sa kapin kun kulang P810,000 ang 54 gramos sa gituohang shabu nga nakuha sa mga suspetsado sa upat ka gikasang mga operasyon uban ang Talomo PNP ug Criminal Investigation and Detection Group (CIDG-XI).
Lima ka mga drug suspects ang malampusong nadakpan nga sila Jayson Bendoy alyas Jayson usa ka Civil Security Unit o CSU, 35 anyos residente sa Block 40, Lot 11, Country Homes, Cabantian ug Razil Manlapaz, 29 anyos, taga- San Francisco Village, Barangay Centro Agdao ning syudad diin nakuha sa ilang posisyon ang gituohang shabu nga mobalor ngadto sa P30,000 alas 2:00 sa hapon sa usa ka hotel sa Cabaguio Avenue ning dakbayan.
Samtang arestado alas 2:45 sa hapon naaresto usab ang laing High Value Target sa may Samat St. Central Park Subd., Bangkal si Zosimo Muki Capesos Jr. alyas Muki diin nakuha kaniya ang gituohang shabu nga adunay estimated street value nga P346,000 ug .45 nga baril ug mga bala.
Kapin kun kulang P15,000 nga gituohang shabu usab ang nasakmit sa suspek nga si Gemairh Sultan alyas Tol, 32 anyos sa operasyon sa mga operatiba sa may Mt. Mayon St., Barangay Malvar, Poblacion ning dakbayan bandang 5:13 sa hapon ug nakuhaan usab kini’g .38 nga revolver.
Ug mokabat sa kapin kun kulang P442,000 ka mga gisuspetsahang shabu ug mga assorted drug paraphernalia ang nakuha sa posisyon sa laing HVT nga si Russel Arias, 42 anyos sa joint buy-bust sa may Queens Avenue, Royal Valley, Bangkal ning dakyaban alas 8:40 sa gabie.
Ang mga lima ka mga nadakpang mga drug suspects gipasakaan na og kasong may kalapasan sa R.A. 9165 ug laing kasong may paglapas sa R.A. 10591 ang gipasang-at usab kang Sultan ug Capesos diin gawas sa droga nakuhaan usab kini’g mga armas.
RadyoMaN Aimee Guinita
