Pagadian City – Nasunog ang kapin 110 ka balay sa dakbayan sa Pagadian kagahapon sa Buntag.
Sa nasangi nga balita sa RMN DXPR Pagadian, gikan mismo sa City Fire Station, nagsugod ang kalayo sa Purok Bakhaw B, Brgy. Kawit sakop ning syudad pasado alas 9:30 sa buntag ug daling nikatay ang kalayo kay kadaghanan sa mga balay gama man sa light materials.
Mokapin sa tulo ka oras una hingpit nga napalong kalayo diin ang nakitang problema sa mga bumbero mao ang kapi-ot sa dalan rason nga naglisod pagsulod ang mga fire truck.
Sa inisyal nga imbestigasyon sa BFP Pagadian, unang niulbo ang kalayo sa balay ni Josephine Dupio, usa ka Banana Que vendor.
Sumala ni Alyas Cindy usa sa mga nasunogan wala sa iyang balay ang tag-iya kay naandan niingi nga muduaw sa iyang bana nga priso matag adlaw nga domingo busa wala dayon ma-atiman ang kalayo ug nakatabok kini sa mga silingan nga balay apan naninguha pa unta ang mga residente sa pagpalong sa kalayo pero wala na kini masalbar.
Moabot sa 1.1 milyones ang kantidad sa mga kabtangan nga naugdaw samtang unom usab ka indibidwal ang nasamdan ug napaso sa maong sunog.
Kasamtangan nga gapasilong sa barangay covered court sa Kawit ang kapin 123 ka pamilya nga nasunogan.
