Nag-self quarantine sugod niadtong Abril 10 si Kapitan Nilda Hamoy, duha ka mga kagawad ug kapin 20 ka mga empleyado sa Barangay Dalipuga, ning dakbayan sa Iligan.
Kini human mamatay ang ilang kaubang empleyado tungod kay naglisod sa pag-ginhawa ug adunay balik-balik nga hilanat, mga simtomas sa COVID-19, apan walay history of travel sa mga lugar nga dunay kumpirmadong kaso sa virus.
Matud pa ni Hamoy sa phone interview sa RMN Iligan, Abril 9 dihang nagpadala ang 40 anyos nga lalaking empleyado sa iyang kaubang trabahante sa barangay ngadto sa tambalanan tungod kay gihangak ug naglisod sa pag-ginhawa.
Didto nasuta, matud pa, nga duna na kini balik-balik nga hilanat.
Abril 10 sa kadlawon dihang nabugtu-an kini sa kinabuhi ug gilayong gipalubong pasado alas-11:00 sa buntag sa susamang adlaw sa may sementeryo sa Dalipuga.
Wala na kini gi-haya tungod usab sa kasamtangang sitwasyon ug sa protocol sa Department of Health nga gilayong ilubong ang namatay sa sakit nga susama’g simtomas sa COVID-19.
Miingon si Hamoy nga gimandoan sila sa Inter-Agency Task Force on COVID-19 sa Iligan sa pag-quarantine aron maniguro samtang naghulat sa COVID-19 test result niadtong namatay nga ilang naka-uban sa pag-distribute og relief food packs sa barangay.
Kini bisan paman nga daku ang ilang pagduda nga dili COVID ang namatyan sa maong empleyado tungod kay aduna kini kaliwat ug kasaysayan nga high blood ug adunay nagnurok sa lawas nga simtomas sa dengue.
Kung mogawas ang resulta nga negatibo sa COVID ang maong empleyado, dili na ipadayon nilang Hamoy ang 14 ka adlaw nga home quarantine ug magpadayon sila sa ilang trabaho sa barangay. (Divina M. Suson, Barangay Dalipuga, April 14)
