Kini ang pipila sa reaksyon sa Davaoeños human sa nag-viral nga video nga kuha ni Pretzel Cabe asa makita nga gigisi ni Kapitan Carlo Robi sa Barangay 5, Poblacion, Catubig, Northern Samar ang papel kun certificate of indigency sa duha ka estudyante nga ilang gamiton alang sa scholarship application.
Kumento sa Davaoeño nga si Aresmie Ormega, dili maayo nga kinaiya ilabi na mga opisyales sa gobyerno ang sama sa gipakita sa kapitan tungod kay giingong dili niini kapartido o supporter ang nanginahanglan kaniya.
“Ka wa’y batasan ui. Di mamersonal, kap. Hala, ikaw pa-eskwela sa mga anak ana. Ikaw buhi ana nila kap. Puslan man yano ra nimo gigisi na,” kumento ni Ormega.
Kumento usab sa netizen nga si Alcris Apigo Alido nga mas maayo kung ipaabot sa Department of Interior and Local Government (DILG) ang insidente diin nagtuo siya nga paglapas kini sa Local Government Code.
Ning pagsulat ning balita, dul-an katunga sa milyon na ang views sa maong video nga padayon usab nga miani og kalagot sa netizens.
RadyoMaN Kirby Manzon
