Davao City – Posibleng kakontra lamang sa mga batan-on ang mga namunal kanila sa internetan sa may Barangay 76-A, Bucana ning dakbayan.
Kini maoy lantaw ni Barangay 76-A Punong Barangay Rolando Trajera subay sa ilang gihimong imbestigasyon sa barangay.
Segun ni Trajera, blangko pa gihapon sila kung kinsa kadtong mga lalaking namunal tungod kay nakatabon ang mga dagway niini luwan sa mga motorsiklo nga kalit mo-abot sa lokasyon.
Gibutyag ni Trajera nga pabor siya sa giingong Davao Bunal Squad tungod kay makatanum gyod kini’g tumang kahadlok ilabi na diha sa mga buluyagong kabataan.
“Ako kung naay Bunal Squad, lipay kaayo ko ana kay ang mga batan-on mahipos og sayo, mao mani makatarong sa atong mga batan-ong maldito,” matud ni Trajera.
Nagtoo si Trajera nga dili mga awtoridad ang nagpaluyo sa giingong Davao Bunal Squad kon dili mga tawong buot lamang mo-ayudad sa paningkamot sa gobyerno diha sa pagpatunhay sa kalinaw sa atong sosyedad.
RadyoMaN Aimee Guinita
