Davao City – Wala nakaikyas ang usa ka Barangay kapitan sa kamot sa mga otoridad human gisilbi ang search warrant batok kaniya nahitabo sa Davao Oriental kaganinang alas 2:30 sa kadlawun, October 19, 2018.
Sa report sa Police Regional Office kun PRO XI, naila ang arestado nga si Brgy. Chairman Erwin Barabag sa Purok Mansanitas, Brgy Macangao, Lupon, Davao Oriental kinsa siya gikonsiderang Level 2 High Value Target sa PRRD Narco List diin narekober sa iyaha ang usa ka unit Cal. .45 nga dunay mga bala, ug mga sachets sa gituohang shabu.
Samtang sa pagsilbi sa uban pang search warrants sa Davao Oriental, nasikop usab ang usa ka sundalo nga giilang si PFC Rhean Baligwat, miyembro sa Philippine Army nga nadesignar sa 67IB kinsa nakuhaan og fragmentation grenade, mga bala ug assorted drug paraphernalias.
Ang sundalo nadakpan sulod sa balay sa usa ka Em-em Wenceslao sa Purok Claro, Brgy poblacion, Lupon, Davao Oriental kinsa siya usab nakuhaan og gituohang shabu.
Dugang pa nga dakpan usab ang usa ka Ruth Petiluna ug Marjun Generale, Baby Shane Palma sa Lupon ug parehong nakuhaan og gituohang shabu.
Mag atubang ang mga dinakpan og kasong adunay kalapasan sa section 11 ug 12 sa RA 9165 kun Dangerous Drugs Act of 2002 ug RA 10591 kun Act providing for a Comprehensive Law on Firearms and Ammunition.
Gilusad sa hiniusang pwersa sa RPDEU 11, RMFB 11, Lupon Municipal Police Station and PDEA 11 ang maong operasyon sa nasangpit nga lugar.
RadyoMaN Renz Barbarona
