Davao City – Dili katoo si Barangay 9-A Kapitan Tata Llubit sa kalit nga pagluwat sa katungdanan ni Vice Mayor Paolo Duterte atol sa special session sa konseho kagahapong adlawa.
Dili kadawat si Llubit nga nag-resign ang bise mayor sanglit maayo man ang performance sa opisyal ug daghan kini’g natabangan busa walay rason aron himoon ang mao nga lakang.
Dili madawat ni Llubit ang gipunting nga rasones sa bise mayor sama sa isyu sa Bureau of Customs, bangi sa iyang anak nga si Isabelle, problema sa unang kaminyoon ug uban pa mao nga miluwat kini sa puwesto.
Apan ugaling mao gayod ang rason segun sa kapitan, kaya raman kini sulbaron pinaagi sa pag-istorya sa iyang anak nga dili na musangko pa sa resignation.
Miapelar si Marilog District Barangay Salaysay Kapitan Robert Itdang kang Vice Mayor Pulong Duterte nga dili i-apil ang iyang trabaho gumikan lamang sa mga isyu niigo kaniya sama sa photoshoot sa iyang anak nga si Isabelle nga gi-bash ug maayo sa mga netizens.
Matud ni Itdang nga wala unta nagpadala sa isyu ang Bise Mayor ug damayon ang iyang career sa politika kay isip politiko normal lang daw nga duna gyo’y mga tawo manaway ug mamahid og isyu sama sa BOC tara system ug uban pa.
Pikas bahin, miapelar si Barangay Lasang Kapitan Alan Simo-ag sa Bise Mayor nga ikunsidera una ang iyang nakab-ot nga hukom sanglit nagkinahanglan ang konseho sa iyang liderato alang sa pagmintar sa kalig-onan, epektibo,ug sa panaghiusa sa konseho.
Giangkon ni Mayor Sarah Duterte-Carpio nga nasayod na kini daan sa laraw sa iyang igsoon ug gidawat niini ang resignation sa pagka-vice mayor sa siyudad sa dabaw.
Giingon sa Mayor nga si Majority Floor Leader Councilor Bernie Al-ag ang muhulip kang Pulong isip bise mayor sa dakbayan sa Dabaw gikan karon hangtud sa 2019.
RadyoMaN Joel Viray
