Davao City – Gikalingawan karon sa mga pamilya ug mga batang nisuroy sa usa ka mall sa may Lanang ning syudad ang mga mascot nila Presidente Rodrigo Duterte ug PNP Chief Oscar Albayalde aron magpahulagway.
Gisulti sa Police Regional Office XI nga kini ang ilahang pinasahing pamaagi sa kapulisan dili lang aron ma-entertain ang mga tao apan aron ipromotar ang public safety dinhi sa rehiyon karong kapaskuhan ug bag-ong tuig.
Ang Regional Mobile Force Batallion kun RMFB XI nga gipamunuan ni PSUPT. Maximo Sebastian maoy nagpasiugna niini nga gimik para malipay ang bata ug mga hamtong.
Giduyugan usab sa RMFB XI band ang publiko sabay sa pagtunol og mga leaflets kalabot sa mga tips aron dili mabiktima sa mga krimen.
Gidayeg ni Police Regional Office XI Regional Director PCSUPT Marcelo Morales ang inisyatibo sa RMFB XI kay pinaagi sa mascot masayran sa komunidad labaw na ang mga kabataan nga dili angay kahadlukan ang mga pulis.
RadyoMaN Aimee Guinita
