Davao City – Gipalig-on pa sa kapulisan ang mga ebidensiya batok ngadto sa mga responsable sa pagkutlo sa kinabuhi sa kagawad sa Barangay Gumalang niadtong Marso 14, 2021, alas-8:20 sa gabii sa Brgy. Gumalang, Baguio Dist., Davao City.
Sa interbyu sa DXDC RMN Davao kang Police Major Archilles Barguio, Station Commander sa Baguio Police Station, padayon ang ilang gihimong paghinabi sa mga nakasaksi sa pagpusil sa biktimang si Francis Monrial Balucos, watchman sa Construction company ug residente sa Purok 1-B, Brgy. Gumalang, Baguio Dist., Davao City.
Sumala niini, work related ug politika ang posibleng motibo sa pagpusil patay sa biktima.
Inbestigahan usab ang mga aktibidad sa biktima sa dihang nakapuyo kini sa Bukidnon niadtong niaging tuig. Wala pay gipagawas ang Baguio Pnp sa mga persons of interest sa krimen tungod sa nagpadayong pag-inbestiga sa mga saksi.
Duha ka wala mailhing suspek base sa description sa mga saksi nga nagsul-ob og blue nga sweetshirt ug blue maong pants, samtang ang usa naka-brown t-shirt ug maong pants ang niduol ug nipusil sa ulo sa biktima. Si Balucos, anaa sa listahan sa drop out drug surrenderee sa maong Barangay.
RadyoMan Aimee Guinita
