Roxas City, Capiz- Blangko pa tubtob sa subong ang mga kapulisan sa suspek sa kamatayon ni Kagawad Onel ‘Dodoy’ Arandez sang Brgy Punta Tabuc matapos ini ang ginluthang sang wala pa makilala nga mga persona nga nakasakay sa pula nga Toyota Innova samtang ini ang yara sa isa ka talyer sa Barangay Cagay, Roxas City kahapon sang aga.
Nag-angkon sang madamo nga igo sang bala sa ulo kag lawas ang biktima nga amo ang gintunaan sang iya kamatayon.
Suno sa imbestigasyon, nagapakay-o sang iya nga motorsiklo ang biktima sa talyer sang gulpi na lamang nga nag pundo ang isa ka salakyan sakay ang mga naka-bonnet nga suspek kag ginpaulanan sang luthang ang biktima.
Ginpahayag ni Police Master Sargeant Ramil Arcangeles sang RCPNP nga kalakip sa mga ginasunod nga anggulo sang mga kapulisan amo ang parte sa ilegal nga druga.
Sa madumdoman nga una na nga naaresto si Arandez sang nakaligad nga tinuig sa ginkasa nga drug buybust operation sang Philippine Drug Enforcement Agency(PDEA) apang ini ang nahilway.
Ini ang ginakabig man nga High Value Target(HVT) kag na-identify nga kalakip man listahan sang PNP Directorate for Intelligence.
