Dipolog City-Walay hunong karon sa paghimo ug mga checkpoint ang kapulisan dinhi sa probinsya sa Zamboanga del norte diha sa mga kadalanan nga gilangkuban kini sa 25 ka mga lungsod ug duha ka syudad ning probinsya.
Adlaw ug gabie, walay hunong sa pag checkpoint ang Kapulisan aron gayud nga masiguro ang seguridad sa katawhan ning probinsya nga walay makasulod nga indibidwal nga magsabwag ug kagubot.
Gipahugtan ang seguridad tungod usab sa sunod-sunod nga bombing dinhi sa Zamboanga peninsula una didto sa may Mt. Carmel Cathedral sa Jolo, Sulu, nga gikamatay sa 21 ka mga tawo ug kapin sa 100 ang angol samtang kagahapon sa kadlawon didto usab mibusikad ang Granada sulod mismo sa Mosque nga gikamatay sa duha ka mga lider ug gikaangol sa mga kauban niini.
Hinungdan nga naka heightened alert sa kanunay ang kasundaluhan ug kapulisan aron proteksyonan ang yanong katawhan.
Bisan paman gipailawom kita sa martial Law pero dili garantiya nga walay makasulod nga dautang tawo nga maghimo ug kagubot.
Gani ang kapulisan karon dinhi sa dakbayan sa dipolog naghimo o nagbutang ug mga poster diha sa pampublikong lugar para sa bomb awareness, ngadto sa publiko ilabi na gayud nga target sa mga terorista ang pampublikong lugar.
Naghangyo kapulisan sa publiko nga dili magpanuko pagtaho kanila kun ugaling adunay mga kadudahang butang o mga tawo aron dali nga maaksyonan.
Gidugang usab paghangyo sa mga tinugyanan sa balaod nga dili magpataka ug share sa mga mensahe o mga naka post diha sa social media ilabi na kun walay kamatuoran.
