Gisiguro sa kapulisan sa Lanao del Sur nga walay angayang ikahadlok ug ikabalaka ang publiko sa lalawigan, human migawas sa social media ang memorandum gikan sa Provincial Police Office (PPO).
Ang nasangpit nga memorandum nagmando sa tanang mga officers-in-charge sa mga municipal police stations, lakip na sa chief of police sa Marawi City, nga ipailawom sa full alert status ang ilang matag area of responsibility.
Aduna, matud pay, nadawat nga impormasyon ang kapulisan gikan sa kasaligang tinubdan nga adunay kapin kun kulang 200 ka mga armadong sakop sa Dawlah Islamiya-Abu Sayyaf Group (DI-ASG) ang nakit-an sa mga bukirang bahin sa mga lungsod sa Madalum, Marantao ug Piagapo.
Matud pa ni Col. Rex Derilo, director sa Lanao Del Sur police, gipa-validate na nila ang nasangpit nga impormasyon apan walay makuhang timailhan nga tinood kini.
Miingon si Derilo nga walay pagtugot ang pagpagawas sa maong memorandum tungod kay internal kini, apan kinahanglan nga maniguro ang kapulisan aron dili na mahitabo ang nahitabo pag-usab sa Marawi City niadtong 2017.
