Davao City- Malipayon nga gipahibalo sa Buhangin Police Station nga nagpabilin nga nagmalinawon ang tibuok distribo sa Buhangin ning siyudad sa Davao.
Masigarbuhon nga giistorya ni Police Major Estrello Ramiso nga nag-zero crime rate ang ilang area of responsibility karong semanaha.
Gibutyag ni Ramiso nga gikan niadtong adlaw’ng Lunes ug hangtud karong adlawa, Disyembre 19, 2020 walay natalang bisan unsang matang sa mga krimen ning panahon sa Misa de Gallo.
Segun ni Ramiso, wala sad sila’y mga nadakpan nga nakalapas sa health protocol sa mga manimbahay sa Saint Francis Parish Church sa may Laverna Hills ug Saint Mary Parish Church sa may Cabantian.
Nagtoo ang hepe nga nahimong epektibo ang ilang gipatuman nga security measures ug pagbutang og mga pulis sa duha ka simbahan busa wala makahigayon ang mga dautang elemento sa pagbiktima sa mga manimbahay.
Gipasalamatan ni Ramiso ang katawhan gumikan sa ilang pagsunod sa pagsuot og face mask, face-shield, pagdala og hand sanitizer, ug uban pa nga labing gikinahanglan pa sa uban nga pamprotekta sa kaugalingon gikan sa coronavirus disease 2019 (COVID-19).
RadyoMaN Joel Viray
